ໃນຕອນເຊົ້າ ຂອງວັນທີ 14 ມີນາ 2017 ກະຊວງ ໄປສະນີ ໂທລະຄົມມະນາຄົມ ແລະ ການສື່ສານ (ກະຊວງ ປທສ) ໄດ້ຈັດພິທີຖະແຫຼງຂ່າວ ການຈັດງານປະກວດ Lao ICT Award 2017 ຂຶ້ນ ທີ່ ຫ້ອງປະຊຸມຊັ້ນ 1, ສະຖາບັນ ໄປສະນີ, ໂທລະຄົມມະນາຄົມ ແລະ ການສື່ສານ. ເປັນກຽດຮ່ວມຖະແຫຼງຂ່າວໂດຍ ທ່ານ ປອ ທະວີສັກ ມະໂນທັມ, ຫົວໜ້າກົມເຕັກໂນໂລຊີຂໍ້ມູນຂ່າວສານ, ກະຊວງ ປທສ, ຄະນະກົມທີ່ກ່ຽວຂ້ອງ ພ້ອມດ້ວຍແຂກທີ່ຖືກເຊີນ ຈາກບັນດາກະຊວງ, ອົງການທຽບເທົ່າ, ບໍລິສັດທາງດ້ານໄອຊີທີ, ທະນາຄານ, ຫົວໜ່ວຍທຸລະກິດ ແລະ ສະຖາບັນການສຶກສາຕ່າງໆ ຫຼາຍກ່ວາ 120 ທ່ານ.



  ເພື່ອປະຕິບັດຕາມພາລະບົດບາດໃນການສົ່ງເສີມ ການພັດທະນາວຽກງານເຕັກໂນໂລຊີສື່ສານ-ຂໍ້ມູນຂ່າວສານ (ໄອຊີທີ), ກະຊວງ ປທສ ຈຶ່ງເປັນເຈົ້າພາບຈັດງານປະກວດແຂ່ງຂັນທາງດ້ານໄອຊີທີລາວ ຫຼື ເອີ້ນວ່າ Lao ICT Award 2017. ຊຶ່ງງານປະກວດຮອບສຸດທ້າຍ ແລະ ການປະກາດຜົນລາງວັນ ຈະໄດ້ຈັດຂຶ້ນໃນຕົ້ນເດືອນມິຖຸນາ 2017 ນີ້. ຈຸດປະສົງຂອງການປະກວດຄັ້ງນີ້ ແມ່ນເພື່ອສົ່ງເສີມໃຫ້ນັກຮຽນ-ນັກສຶກສາ, ນັກຄົ້ນຄວ້າ ຈາກຂະແໜງການພາກລັດ, ພາກເອກະຊົນ ກໍ່ຄືບັນດາບໍລິສັດ ແລະ ທຸກຄົນໃນສັງຄົມລາວ ໄດ້ມີໂອກາດສະແດງຄວາມສາມາດດ້ານເຕັກໂນໂລຊີ ICT ກໍ່ຄືຜະລິດຕະພັນ, ການບໍລິການ ແລະ ນະວັດຕະກຳດ້ານ ICT ຂອງຕົນ ໃຫ້ສັງຄົມ ໄດ້ເຫັນເຖິງ ສັກກະຍະພາບ ແລະ ຄວາມສາມາດຂອງຄົນລາວ ທາງດ້ານ ICT. ພ້ອມນັ້ນ, ກໍຍັງເປັນການສ້າງແຮງບັນດານໃຈໃນການສົ່ງຜົນງານເຂົ້າຮ່ວມໃນເວທີສາກົນ ໂດຍສະເພາະ ໃນອາຊຽນ ກໍຄືໂຄງການ ASEAN ICT Award 2017.
  ງານປະກວດ Lao ICT Award 2017 ແມ່ນການແຂ່ງຂັນທາງດ້ານໄອຊີທີທົ່ວປະເທດ ຄັ້ງທໍາອິດຂອງ ສປປ ລາວ. ຊຶ່ງເປັນການເປີດກ້ວາງໃຫ້ທຸກພາກສ່ວນສາມາດນຳຜະລິດຕະພັນຂອງຕົນເຂົ້າປະກວດ. ການແຂ່ງຂັນປະກອບມີ 06 ໝວດ ຄື: ໝວດພາກລັດ (Public Sector), ພາກເອກະຊົນ (Private Sector), ເພື່ອສັງຄົມ (Corporate Social Responsibility), ເນື້ອໃນດີຈີຕອນ (Digital Content), ບໍລິສັດສ້າງຕັ້ງໃໝ່ ທາງດ້ານໄອຊີທີ (Start-Up Company), ແລະ ໝວດການຄົ້ນຄ້ວາ-ພັດທະນາທາງດ້ານໄອຊີທີ (Research and Development). ນອກຈາກນັ້ນ ໃນໝວດເນື້ອໃນດີຈີຕອນ ຍັງມີສອງລາງວັນພິເສດ ຄື: ການສ້າງວີດີໂອແນະນຳກະຊວງ ປທສ ແລະ ການສ້າງຟ້ອນພາສາລາວ (Lao front). ສ່ວນລາງວັນປະກອບມີ ເງິນສົດຈຳນວນໜຶ່ງ, ໂຫຼ້ລາງວັນ, ໃບຍ້ອງຍໍຈາກລັດຖະມົນຕີກະຊວງ, ຂອງຂັັວນຈາກຜູ້ສະໜັບສະໜູນ ແລະ ໄດ້ລົງວາລະສານໄອຊີທີລາວ 1 ສະບັບ. ພ້ອມກັນນັ້ນ ຜະລິດຕະພັນທີ່ໄດ້ຮັບລາງວັນໃນການແຂ່ງຂັນຄັ້ງນີ້ ກໍ່ຈະຖືກຄັດເລືອກ ເຂົ້າແຂ່ງການປະກວດລະດັບອາຊຽນ ຫຼືເອີ້ນວ່າ ASEAN ICT AWARD 2017. ງານດັ່ງກ່າວຈະເລີ່ມຮັບສະໝັກຜະລິດຕະພັນສົ່ງເຂົ້າປະກວດ ຕັ້ງແຕ່ວັນທີ 15 ມີນາ ຈົນເຖິງ 15 ພຶດສະພາ 2017. (ລາຍລະອຽດເງື່ອນໄຂການເຂົ້າປະກວດ ແລະ ກະຕິກາການປະກວດ ແມ່ນສາມາດຕິດຕາມໄດ້ໃນເວັບໄຊ laoictaward.gov.la)





  ງານ Lao ICT Award 2017 ປີນີ້ ຈັດຂຶ້ນໂດຍການຮ່ວມມືສະໜັບສະໜຸນ ແລະ ອຸປະຖຳຈາກຫຼາຍພາກສ່ວນເປັນຕົ້ນແມ່ນ ບັນດາກະຊວງ, ສະມາຄົມ ໄອຊີທີລາວ, ບັນດາບໍລິສັດ ເຊັ່ນ: ລັດວິສາຫະກິດ ລາວໂທລະຄົມ, ບໍລິສັດ Unitel, ບໍລິສັດ TVS (ALO), ບໍລິສັດ ETL, ບໍລິສັດ Cyberia, ບໍລິສັດ DataCom, ບໍລິສັດ MicroInfo, SkyTelecom ແລະ ບໍລິສັດອື່ນໆ.