ສະພາແຫ່ງຊາດ ພິຈາລະນາຮ່າງກົດໝາຍເຕັກໂນໂລຊີການສື່ສານຂໍ້ມມູນ-ຂ່າວສານ.
ມື້ທີ 11 ຂອງການດຳເນີນ ກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ VIII, ບັນດາສະມາຊິກສະພາແຫ່ງຊາດ (ສສຊ) ທຸກເຂດເລືອກຕັ້ງ ໄດ້ສຸມໃສ່ປະກອບ ຄຳຄິດຄຳເຫັນ ໃສ່ຮ່າງກົດໝາຍ ວ່າດ້ວຍເຕັກໂນໂລຊີ, ການສື່ສານ ແລະ ຂໍ້ມູນ-ຂ່າວສານ ເຊິ່ງສະເໜີໂດຍ ທ່ານ ທັນສະໄໝ ກົມມະສິດ ລັດຖະມົນຕີ ກະຊວງໄປສະນີ ໂທລະຄົມມະນາຄົມ ແລະ ການສື່ສານ, ມີທັງໝົດ 12 ພາກ, 7 ໝວດ ແລະ 71 ມາດຕາ ເພື່ອໃຫ້ມີເນື້ອໃນຈະແຈ້ງ, ຄົບຖ້ວນ, ຮັດກຸມ ແລະ ນຳໃຊ້ໄດ້ຢ່າງມີປະສິດ ທິຜົນ.
ທ່ານ ທັນສະໄໝ ກົມມະສິດ ໄດ້ຍົກໃຫ້ເຫັນເຫດຜົນ ແລະ ຄວາມຈຳເປັນ ໃນການສ້າງຮ່າງກົດໝາຍ ສະບັບນີ້ຂຶ້ນມາ ເພາະໃນປັດຈຸບັນ ການນຳໃຊ້ເຕັກໂນໂລຊີ, ການສື່ສານ ແລະ ຂໍ້ມູນ-ຂ່າວສານ ແມ່ນມີການຂະຫຍາຍຕົວຢ່າງວ່ອງໄວ ແລະ ທຸກປະເທດໃນໂລກ ມີການນຳໃຊ້ເຕັກໂນໂລຊີນີ້ ເຂົ້າໃນທຸກຂົງເຂດວຽກງານ ທັງພາກລັດ, ທຸລະກິດ, ການຄ້າຂາຍ ແລະ ການສື່ສານຕ່າງໆ ເຮັດໃຫ້ມີການ ຕິດຕໍ່ພົວ ພັນສະດວກວ່ອງໄວ ແລະ ທັນການ. ຢ່າງໃດກໍຕາມ ໄລຍະຜ່ານມາການນຳໃຊ້ເຕັກໂນໂລຊີ, ການສື່ສານ ແລະ ຂໍ້ມູນ-ຂ່າວສານ ໃນປະເທດເຮົາ ຍັງບໍ່ທັນມີນິຕິກຳໃດມາຄຸ້ມຄອງ ຈຶ່ງເຮັດໃຫ້ການ ນຳໃຊ້ເຕັກໂນໂລຊີ ມີການກະແຈກກະຈາຍ, ບໍ່ລວມສູນ, ການຄຸ້ມຄອງດ້ານເຕັກນິກ ແລະ ບໍລິການບໍ່ມີຄຸນນະພາບ ອັນໄດ້ສົ່ງຜົນກະທົບຕໍ່ ການພັດທະນາເສດຖະກິດ-ສັງຄົມ ຂອງປະເທດຢ່າງຫລວງຫລາຍ. ສະນັ້ນ, ຫາກກົດໝາຍສະບັບນີ້ ໄດ້ຮັບການຮັບຮອງ ແລະ ປະກາດໃຊ້ກໍຈະເປັນເຄື່ອງມືທີ່ດີ ໃຫ້ແກ່ການຄຸ້ມຄອງ, ຕິດຕາມກວດ ກາວຽກງານເຕັກໂນໂລຊີ, ການສື່ສານ ແລະ ຂໍ້ມູນ-ຂ່າວສານ ໃຫ້ມີປະສິດທິພາບທຽບເທົ່າກັບສາກົນເທື່ອລະກ້າວ.
ການປະກອບຄຳເຫັນ ໃສ່ຮ່າງກົດໝາຍສະບັບນີ້, ບັນດາສສຊ ໄດ້ ຄົ້ນຄວ້າພິຈາລະນາ ແລະ ລົງເລິກ ໃນຫລາຍໝວດຫລາຍມາດຕາ ໂດຍສະເພາະ ການກຳນົດນະໂຍບາຍ ຂອງພາກລັດ ໃນມາດຕາ 4 ເພື່ອໃຫ້ມີຄວາມຖືກຕ້ອງສອດຄ່ອງ ແລະ ແທດເໝາະກັບສະພາບການ ພັດທະນາເຕັກໂນໂລຊີ, ການສື່ສານ ແລະ ຂໍ້ມູນ-ຂ່າວສານ ຂອງປະເທດເຮົາ ໃນປັດຈຸບັນ. ນອກນີ້, ຍັງສຸມໃສ່ພິຈາ ລະນາກ່ຽວກັບມາດຕະ ຖານເຕັກນິກ ແລະ ຄວາມປອດໄພ ຂອງການຈຳກັດຂີ້ເຫຍື້ອ ເອເລັກໂທຣນິກ ກໍຄື ພັນທະຂອງຜູ້ໃຫ້ບໍລິ ການ ແລະ ຜູ້ໃຊ້ບໍລິການ ເພື່ອຫລີກລ້ຽງບໍ່ໃຫ້ສົ່ງຜົນ ກະທົບຕໍ່ສິ່ງແວດລ້ອມ. ສິ່ງສຳຄັນ ສສຊ ໄດ້ສະເໜີໃຫ້ພາກລັດ ເອົາໃຈໃສ່ ຄຸ້ມຄອງວຽກງານນີ້ ແຕ່ສູນກາງຮອທ້ອງຖິ່ນ ເປັນຕົ້ນແມ່ນຜູ້ດຳເນີນທຸລະກິດ ຂົງເຂດດັ່ງກ່າວ ຕະຫລອດເຖິງກຸ່ມ ຜູ້ໃຊ້ສື່ອອນລາຍ ໃຫ້ມີຄວາມຮັດກຸມກວ່າເກົ່າ.