ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໄດ້ຈັດກອງປະຊຸມເປີດກວ້າງເນື້ອໃນວິຊາການກ່ຽວກັບ ຮ່າງດໍາລັດວ່າດ້ວຍສູນຂໍ້ມູນຂ່າວສານ ຂື້ນໃນວັນທີ 13 ກໍລະກົດ 2016 ທີ່ສະຖາບັນ ໄປສະນີ ໂທລະຄົມມະນາຄົມ ແລະ ການສື່ສານ, ນະຄອນຫຼວງວຽງຈັນ ໂດຍການເປັນປະທານຂອງ ທ່ານ ທອງໃສ ຊານໄຊຍະ ຮອງເລຂາຄະນະພັກ, ຮອງລັດຖະມົນຕີກະຊວງ ໄປສະນີ ໂທລະຄົມມະນາຄົມ ແລະ ການສື່ສານ ພ້ອມດ້ວຍພາກສ່ວນ ທີ່ກ່ຽວຂ້ອງທຸກກະຊວງຈາກອົງການຈັດຕັ້ງລັດ. ໃນກອງປະຊຸມດັ່ງກ່າວ, ທ່ານ ທອງໃສ ຊານໄຊຍະ ໄດ້ຍົກໃຫ້ເຫັນວ່າ:

  ໃນຍຸກປະຈຸບັນ ເຕັກໂນໂລຊີສື່ສານຂໍ້ມູນຂ່າວສານ ເປັນເຕັກໂນໂລຊີທີ່ທັນສະໄໝ ແລະ ກ້າວໜ້າທີ່ສຸດ ນັບມື້ນັບມີບົດບາດສຳຄັນໃນຊີວິດປະຈຳວັນ ເພື່ອຊ່ວຍສະຕິປັນຍາ ແລະ ມັນສະໝອງຂອງມະນຸດ. ເຕັກໂນໂລຊີສື່ສານຂໍ້ມູນຂ່າວສານ (ICT) ໄດ້ຖືກນໍາໃຊ້ເຂົ້າໃນວຽກງານຄຸ້ມຄອງບໍລິຫານ, ປ້ອງກັນຊາດ-ປ້ອງກັນຄວາມສະຫງົບ, ວັດທະນະທຳ, ການຄ້າ, ການເງິນ, ການບໍລິການ, ການສຶກສາ, ສາທາລະນະສຸກ, ການເຜີຍແຜ່ຂໍ້ມູນຂ່າວສານ ແລະ ວຽກງານພັດທະນາເສດຖະກິດ-ສັງຄົມອື່ນໆ. ສູນຂໍ້ມູນຂ່າວສານກໍ່ເປັນເຕັກໂນໂລຊີ ໜຶ່ງທີ່ມີການນໍາໃຊ້ຢ່າງກວ້າງຂວາງທັງໃນພາກລັດ ແລະ ເອກະຊົນ ເພື່ອເກັບຂໍ້ມູນ ແລະ ຂ່າວສານ ຮັບໃຊ້ໃນການແລກປ່ຽນ, ເຜີຍແຜ່ ແລະ ໃຫ້ບໍລິການແກ່ສັງຄົມ. ໄລຍະທີ່ຜ່ານມາ ການນໍາໃຊ້ສູນຂໍ້ມູນຂ່າວສານ ຍັງມີລັກສະນະກະແຈກກະຈາຍ, ບໍ່ມີມາດຕະຖານລວມ ແລະ ບໍ່ສາມາດເຊື່ອມໂຍງກັນໄດ້ຢ່າງມີປະສິດທິພາບ, ໃນການສ້າງສູນຂໍ້ມູນຂ່າວສານຂອງພາກສ່ວນລັດ ຍັງບໍ່ມີແບບແຜນລວມສູນ ແລະ ເອກະພາບກັນ, ການສ້າງ ແລະ ໃຫ້ບໍລິການຮັບຝາກຂໍ້ມູນ, ການບໍລິການຂໍ້ມູນຂ່າວສານ ຍັງບໍ່ສາມາດປະຕິບັດໄດ້ຢ່າງທົ່ວເຖິງ ພ້ອມນັ້ນການດໍາເນີນທຸລະກິດດ້ານສູນຂໍ້ມູນ ແລະ ສູນຂ່າວສານ ຂອງພາກເອກະຊົນ ກໍ່ມີການດໍາເນີນທຸລະກິດຢ່າງຊະຊາຍ ເຊິ່ງສົ່ງຜົນກະທົບຕໍ່ການເກັບລາຍຮັບເຂົ້າລັດບໍ່ໄດ້ເທົ່າທີ່ຄວນ, ຫຍຸ້ງຍາກໃນການເກັບສະຖິຕິ ເພື່ອປະເມີນຜົນການພັດທະນາຂອງຂະແໜງການ ICT ແລະ ບໍ່ສາມາດຮັບປະກັນຄຸນນະພາບຂອງການບໍລິການ.



  ໃນກອງປະຊຸມເປີດກວ້າງຄັ້ງນີ້ ທ່ານ ປອ ທະວີສັກ ມະໂນທັມ ຮັກສາການຫົວໜ້າກົມເຕັກໂນໂລຊີຂໍ້ມູນຂ່າວສານ ໄດ້ສະເໜີກ່ຽວກັບສະພາບລວມວຽກງານການພັດທະນາ ແລະ ນໍາໃຊ້ສູນຂໍ້ມູນຂ່າວສານຢູ່ລາວດ ພ້ອມນັ້ນກໍ່ໄດ້ຍົກໃຫ້ເຫັນເປົ້າໝາຍ ແລະ ສິ່ງທີ່ຈະໄດ້ຮັບຂອງດໍາລັດສະບັບນີ້. ຈາກນັ້ນກອງປະຊຸມໄດ້ປຶກສາຫາລືທາງດ້ານວິຊາການກ່ຽວກັບເນື້ອໃນຂອງດໍາລັດ, ການກຳນົດຫຼັກການ, ລະບຽບການ ແລະ ມາດຕະການກ່ຽວກັບ ການຄຸ້ມຄອງ, ການຕິດຕາມກວດກາສູນຂໍ້ມູນຂ່າວສານ ເພື່ອເຮັດໃຫ້ວຽກງານດັ່ງກ່າວ ໄດ້ຮັບການພັດທະນາຢ່າງເປັນລະບົບ, ມີຄຸນນະພາບ, ປອດໄພ ແລະ ສົ່ງເສີມ ການຫັນເປັນອຸດສາຫະກໍາ ແລະ ຫັນເປັນທັນສະໄໝ ແນໃສ່ປົກປ້ອງສິດ ແລະ ຜົນປະໂຫຍດຂອງລັດ, ບຸກຄົນ, ນິຕິບຸກຄົນ ແລະ ການຈັດຕັ້ງ, ປະເທດຊາດມີຄວາມໝັ້ນຄົງ, ສັງຄົມ ມີຄວາມສະຫງົບ, ເປັນລະບຽບຮຽບຮ້ອຍ ແລະ ຍຸຕິທຳ, ສາມາດເຊື່ອມໂຍງກັບພາກພື້ນ ແລະ ສາກົນ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ.